Приветствую Вас, Гость
Главная » 2020 » Декабрь » 8 » БҮГҮН ДЬОРУОЙ КҮНҮН БЭЛИЭТИИБИТ!
19:39
БҮГҮН ДЬОРУОЙ КҮНҮН БЭЛИЭТИИБИТ!

Быйыл киэн туттар биир дойдулаахпыт, Баатара нэһилиэгиттэн төрүттээх сахалартан бастакынан Сэбиэскэй Сойуус Дьоруойа Федор Кузьмич Попов төрөөбүтэ 99 сылын бүгүн, ахсынньы 8 күнүгэр, бэлиэтиибит.

Бүгүн Дьоруой искибиэригэр мустубут дьон ааспыт алдьархайдаах сэрии эрэйин, кыһалҕатын билбиттэргэ курутуйан, дьоруойдуу хорсуннук кыайбыт буойуннарбыт албан ааттарыгар сүгүрүйэн венок, сибэкки дьөрбөтүн уурдулар, ытыктаан мүнүүтэ чуумпуран турдулар.

Тэрээһиҥҥэ Майатааҕы академик В.П. Ларионов аатынан орто оскуола, Ф.Г. Охлопков аатынан орто оскуола, И.Г. Тимофеев аатынан лицей үөрэнээччилэрэ кыттыыны ыллылар. Улууспут баһылыга Николай Старостин, Майабыт баһылыга Дмитрий Тихонов, Мэҥэ Хаҥалас уонна Уус Алдан улуустарын военнай комиссариатын салайааччыта Айаал Петров тыл эттилэр.

„Дьоруой искибиэрин тупсарыы үлэтин аахсыйа ыытаммыт норуот күүһүнэн бастакы түһүмэҕин бүтэрдибит. Эһиилги дьылга Дьоруой төрөөбүтэ 100 сылын үөрүүлээхтик көрсөргө бэлиэ тэрээһин буолуоҕа. Ону таһынан улуус салалтатын кытта биир улахан бырайыакпыт - Кыайыы Монуменын саҥардан оҥоруу үһүс түһүмэҕин бу курдук бары көмөлөөн эһиилги дьылга үлэҕэ киллэриэхтээхпит. Биһиги Дьоруойбут ыччаттарбытын, саха норуотун инникигэ, үрдүккэ сирдиир, кэрэҕэ угуйар. Дьоруой аата үйэлэргэ өлбөөдүйбэтин, кини курдук дойдутугар бэриниилээх Саха сирин туһугар үлэлиир ыччаттар тахса турдуннар“, - диэн баһылык Дмитрий Тихонов эттэ.

Үүнэр 2021 сыл биһиги улууспутугар Дьоруой сыла биллэриллибитинэн биир дойдулаахпыт Дьоруой Федор Кузьмич Попов төрөөбүтэ 100 сылыгар аналлаах былааҕы күөрэттилэр. Аллараа Бэстээхтэн туруммут „Снежный десант“ улуустааҕы бэтэрээннэр уонна эдэр хайыһардьыттар хамаандалара Майаттан салгыы Дьоруой Попов төрөөбүт дойдутугар Сыымахха айаннаата.

Дьоруой Федор Кузьмич Попов холобура суох хорсун быһыыта биһигини барыбытын, кэнчээри ыччаты төрөөбүт дойдуга муҥура суох тапталлаах, бэриниилээх буолууга үөрэтэр, сы-хонук аастаҕын суолтата дириҥээн, үрдээн иһэр.

Биһиги норуоппут Аҕа дойдуну көмүскүүр Улуу сэриигэ ситиспит улууканнаах кыайыыбыт суолтата үйэлэргэ өлбөөдүйүө суоҕа. Ким да умнуллубут, туох да умнуллубат!

 

Хаартыскалар

Просмотров: 32 | Добавил: gummaya | Рейтинг: 0.0/0
Добавлять комментарии могут только зарегистрированные пользователи.
[ Регистрация | Вход ]