Приветствую Вас, Гость
Главная » 2021 » Октябрь » 4 » Аҕаларын стелатын оскуолаҕа бэлэх ууннулар
18:09
Аҕаларын стелатын оскуолаҕа бэлэх ууннулар

Биллиилээх политическай уонна уопсастыбаннай диэйэтэл, норуот дьокутаата, суруналыыс, суруйааччы, өрөспүүбүлүкэ норуот хаһаайыстыбатын үтүөлээх үлэһитэ, сатабыллаах салайааччы Филипп Гаврильевич Охлопков аата быйыл биир дьоһун тэрээһини кытта сибээстэнэн өссө төгүл ааттанна. Кини оҕолоро ‒ Наталья Охлопкова уонна биллиилээх тутааччы, Саха сиригэр элбэх тутууну ыытар тэрилтэлэр салайааччылара Михаил Охлопков аҕаларын стелатын Ф.Г.Охлопков аатын сүгэр Майа оскуолатын иннигэр үөрүүлээх аһыылара буолла. Алтынньы 4 күнүгэр стеланы аһыыга Филипп Гаврильевич оҕолоро, улуус баһылыгын социальнай боппуруостарга солбуйааччы Мирон Свинобоев, Ходоро нэһилиэгин баһылыга Алексей Васильев, кырдьаҕас хомуньуус Анатолий Чичахов, оскуола дириэктэрэ Вера Тимофеева уонна учууталлар, үөрэнээччилэр кытыннылар, салайааччы бүүһүгэр кыһыл сибэккилэри уурдулар.

Стеланы Филипп Охлопков 1988-1991 сылларга хомуньуус баартыйа оройуоннааҕы кэмитиэтин салайар кэмигэр сүрүннээн ылыннарбыт «Ыччат – 2000» анал биир кэлим бырагырааматыгар аныырга оскуола дириэктэрэ Матрена Птицынаны кытта сүбэлэспиттэрин туһунан Михаил Филиппович кэпсээтэ. Ааспыт үйэ 90-с сылларыгар дойду олоҕун укулаата хамсаабыт, үп-харчы кэмчи кэмигэр өрөспүүбүлүкэ оччотооҕу салалтатын тылыгар киллэрэн, Филипп Гаврильевич улууска араас элбэх тутууларга үп көрүллэрин ситиспитэ махталлаахтык ахтылынна. Ол түмүгэр, уонтан, сүүрбэттэн да тахса үөрэҕирии, уһуйаан, доруобуйа харыстабылын, успуорт, култуура эбийиэктэрэ олох чахчылара буоланнар, Мэҥэ Хаҥалас улууһун дьонугар туһалыы тураллара ыйылынна. Онон, стела аналынан оскуола үөрэнээччилэригэр, ыалдьыттарыгар Саха сирин биир уһулуччулаах салайааччытын киэҥ хабааннаах үлэтин биир сүрүн хайысхатын туһунан өйдөбүлү биэрии буолар. Бырагыраама киэҥ ис хоһоонуттан стелаҕа «сорох биридимиэттэри дириҥээн үөрэтэр кылаастар ситимнэрэ», «эдэр дьиэ кэргэн», «ыччат уонна экономическай реформа», «Ыччат уонна политическай реформа» курдук хайысхалара суруллубуттар.

Кинини киһи быһыытынан сыаналаан, ахтан Алексей Коркинович уонна Анатолий Еремеевич тыл эттилэр. Филипп Охлопковы ылыннарыылаах лоп-бааччы тыллаах-өстөөх салайааччы, араатар быһыытынан Алексей Васильев сырдатта, кэлин соҕус кини туһунан суруйар баҕалааҕын эттэ. Өрөспүүбүлүкэҕэ хомуньуус баартыйа оройуоннааҕы кэмитиэтин салайбыт Анатолий Чичахов Филипп Гаврильевиһы халбҥанаабат хомуньуус, кырдьыгы өрө тутар чиэһинэй киһи быһыытынан сыаналаата. «Тутааччылар Арассыыйатааҕы сойуустара» Бүтүн Арассыыйатааҕы салаалар икки ардыларынааҕы үлэ биэрээччилэр холбоһуктарын «Тутууга үтүөлэрин иһин» уордьанын кавалера, СӨ Бочуоттаах тутааччыта, СӨ Үтүөлээх тутааччыта Михаил Охлопков эдэр учууталларга, ыччакка туһаайан бүгүҥҥү эрэ күнүнэн буолбакка, аҕатын курдук ырааҕы көрөн, ыраахха былааннаан олорорго сүбэлээтэ. Эдьиийэ Наталья Филипповналыын аҕаларын икки кинигэтин саҥалыы бэчээттэтэн оскуолаҕа бэлэх аҕалбыттарын иһитиннэрдилэр: 2009 сыллаахха тахсыбыт «Таптал күрүлгэнин» уонна 80-с сылларга хаһыаттарга бэчээттэммиттэриттэн хомуйан «Дьиҥнээх таптал туһунан сиппэтэх сэһэн» кинигэни.

Инникитин стеланы өссө ситэрэн, Филипп Охлопковка анаммыт мемориал таһымыгар таһааран иһии туһунан баҕа санаа этилиннэ.

Эркээйи

 

Хаартсыкалар

Просмотров: 66 | Добавил: gummaya | Рейтинг: 0.0/0
Добавлять комментарии могут только зарегистрированные пользователи.
[ Регистрация | Вход ]